حاجة حلوة والله .. النادى الأهلى نادى القرن وحامى حمى الوطن أطلق يد عدلى القيعى وسلموه مفتاح الخزنة بتاعت النادى علشان يدعمه بدماء جديدة لسة شباب بعد فضايح العواجيز الأخيرة، وطبعا خزنة الأهلى مش أى خزنة ومفتاحها أكيد مش حيكون زى أى مفتاح .. مفتاحها أكبر من المفتاح الصليبة اللى بيفكوا بيه كاوتش العربيات ههههههه .. ما علينا
خد عدلى القيعى الضوء الأخضر وإستلم مفتاح بيت المال وحينزل يسعى فى الأرض فساد يخطف شوية الاعيبة الموهوبين من الأندية علشان يعمر منتخب الأهلى، وبكدا الأهلى يبقى أقوى نادى فى مصر ومدربه أحسن مدرب وياخد كل البطولات ويروح اليابان لأنه يعتبر فعليا بيلاعب نفسه
طبعا حيفاوض لاعيبة الاسماعيلى كلهم الإحتياطيين قبل الأساسيين وممكن ياخد مدربهم كمان يبقى إحتياطى لجوزيه .. أه بمناسبة جوزيه رئيس جمهورية الأهلى أنا سمعت إنه صرح لوسائل الإعلام إن النادى الإسماعيلى ولاية من ولايات جمهورية الأهلى وعاوز يضمه للقلعة الحمراء وليه أطماع إستعمارية فيه .. وإتسربت أنباء إنه حيستخدم فى سبيل ذلك قذائف مدفعية موجهة من أحمد فتحى وأحمد حسن ومعتز إينو وإحتمال يقتحم قلعة الدراويش بهجوم برى بقيادة قائد الفرقة العاشرة مشاه ميكانيكى محمد أبو تريكة، وطبعا مفيش حد حيقدر ينطق والكل حيتفرج على الاسماعيلى وهو بيسقط زى ما كانت مصر بتتفرج على غزة، ولو حد إعترض لا سمح الله إتحاد الكورة حيستخدم حق الفيتو
وبعد ما يخلص عدلى باشا على الاسماعيلى يطلع على الزمالك ياخد إتنين تلاته يقعدهم على الدكة علشان يضيع إستفادة الزمالك بيهم حتى لو هو مش محتاجهم كالعادة .. ويطلع على المصرى يلف لفة .. ويقلب على إسكندرية يشم هواء بحرى وهكذا دواليك
الأهلى يفتح خزاينه ويعمل منتخب يضم أحسن عناصر بتلعب كورة فى مصر والدورى يبدأ وطبعا منتخب الأهلى حيكتسح لانه قتل كل المنافسين ليه ولانه فعليا بيلاعب نفسه
هى دى الكورة فى مصر يا جماعة .. علشان كدا انا فكرت فكرة حلوة تريح الكل
أنا بقترح على إتحاد الكورة إنه يفكك جميع الاندية فى مصر ويوزع الاعيبه الكويسه على الاهلى ويسرح الباقى وبكدا مش حيكون فيه ولا المصرى البورسعيدى ولا الاتحاد السكندرى ولا الأندية البيئة دى ويقسموا لاعيبة الأهلى على المحافظات وبكدا يبقى فيه الأهلى البورسعيدى والأهلى السكندرى والأهلى الإسماعيلاوى وهكذا ونريح نفسنا من الدورى بتاع كل سنة والضحك على الدقون طالما كدا كدا .. يمين يمين .. شمال شمال .. فوق .. تحت .. الأهلى حياخد الدورى يبقا نريح دماغنا من الأول والأهلى يلاعب نفسه أحسن
إيه رأيكم فى الفكرة الجهنمية دى؟؟ إشطة صح
بعد إذنكم أنا رايح أنام بقا
Posts
No comments:
Post a Comment